Lestarstöðvarnar í Løren, Ensjø og Helsfyr í Ósló eru lokaðar eftir að eldur kom upp í lestargöngunum við Helsfyr í nótt. Enginn slasaðist en allt bendir til þess að gaskútar hafi sprungið inni í göngunum.
Skömmu fyrir klukkan átta að staðartíma, klukkan 7 að íslenskum tíma, greindi lögreglan í Ósló frá því á Twitter að búið væri að slökkva eldinn sem var í mannlausum vagni í göngunum. Vagninn var í um 300 metra fjarlægð frá brautarstöðinni og brotnuðu einhverjar rúður á lestarstöðinni við sprenginguna, segir Kristian Krohn Engeset, sem stýrir aðgerðum lögreglu á vettvangi, í samtali við norska ríkisútvarpið.
Aðgerðum lögreglu er lokið á vettvangi og má búast við að samgöngur verði með eðlilegum hætti fljótlega.
#Oslo Helsfyr. Nødetatene er på vei ifm at det skal brenne i en sveisevogn inne i t-banetunnelen mellom Helsfyr og Ensjø. Ingen personer skal være skadd og arbeiderne har evakuert seg ut.
— OPS Politiet Oslo (@oslopolitiops) December 17, 2018