Facebook hefur fjarlægt 1,5 milljónir myndbanda sem sýna árásina sem var gerð í Christchurch á Nýja-Sjálandi. Á sama tíma hefur samfélagsmiðillinn verið gagnrýndur fyrir að hafa ekki tekist betur að stöðva útbreiðslu myndbandanna.
Á meðan vígamaðurinn skaut hvert fórnarlambið á fætur öðru í Al Noor-moskunni í Christchurch tók hann voðaverkið upp og streymdi í beinni útsendingu á Facebook Live. Virtist hann nota myndavél sem hann hafði fest á líkama sinn. Áður hafði hann sett stefnuyfirlýsingu uppfulla af kynþáttafordómum á Twitter.
Facebook segist hafa fjarlægt myndbandið „með snöggum hætti“, ásamt reikningi vígamannsins á Instagram. Á fyrstu 24 klukkustundunum eftir árásina voru 1,5 milljónir myndbanda af árásinni stöðvaðar eða þeim eytt. Þar af var komið í veg fyrir að 1,2 milljónum myndbanda væri hlaðið inn.
Mia Garlick, talskona Facebook á Nýja-Sjálandi, sagði að fyrirtækið væri að „vinna sleitulaust“ við að fjarlægja ólöglegt efni, bæði með aðstoð tækninnar og starfsfólks.
Þrátt fyrir að stjórnvöld hafi beðið fólk um að deila ekki myndbandinu af árásinni, sem er sautján mínútna langt, hefur það farið um netið eins og eldur í sinu. Að sögn sérfræðinga er mjög auðvelt að verða sér úti um það.
Samkvæmt tölum Facebook tókst ekki að hindra að 300 þúsund myndböndum, í það minnsta, væri hlaðið inn. Engar opinberar tölur eru til um hversu oft horft var á þau eða hve oft þeim var deilt.
Jacinda Ardern, forsætisráðherra Nýja-Sjálands, sagði að stjórnvöld gerðu allt sem þau gætu til að stöðva útbreiðslu myndbandsins en benti á að ábyrgðin lægi fyrst og fremst hjá Facebook.
Að sögn nýsjálenska dagblaðsins Herald eru sum stór fyrirtæki í landinu að íhuga að hætta að auglýsa á Facebook í mótmælaskyni. Einn af viðskiptablaðamönnum blaðsins hafði þetta að segja: „Eins og staðan er núna eiga börnin mín á hættu að sjá ofbeldismyndir í beinni útsendingu á Facebook, bara svo að Mark Zuckerberg geti orðið aðeins ríkari,“ skrifaði hann. „Nú er komið nóg.“
Facebook Live hefur áður verið notað til að streyma voðaverkum í beinni útsendingu. Sýnt var beint frá morði í bandarísku borginni Cleveland árið 2017. Bæði Facebook og Twitter segjast hafa fjárfest í tækni og mannskap sem á að takast á við vandann en gagnrýnendur segja að það dugi ekki til.