Íslenska fjölskyldan sem hefur óskað eftir flutningi heim frá Kína er lögð af stað heim. Einhverjar tafir hafa orðið á fluginu þeirra en áætlað er að þau lendi hér á heima í dag. Tafir urðu á flugi þeirra til Evrópu.
Hjálmar Björgvinsson, aðstoðaryfirlögregluþjónn hjá almannavarnadeild ríkislögreglustjóra, telur líklegt að þau fljúgi fyrst til Frakklands. Viðbúið er að það taki talsverðan tíma að afgreiða flugvélina þar.
Fjölskyldan, foreldrar með eitt barn, eru ekki með nein einkenni kórónuveirunnar COVID-19. Þau fóru ekki um nein svæði í Kína þar sem veiran hefur greinst, að sögn Hjálmars. Eins hafa þau fylgt öllum fyrirmælum sem kínversk stjórnvöld hafi gefið út vegna veirunnar.
Við komuna til landsins fara þau í læknisskoðun á höfuðborgarsvæðinu. Eftir það sæta þau hefðbundinni 14 daga sóttkví, líkt og mælst hefur verið til við alla sem hingað koma frá Kína.