Að minnsta kosti 18 eru nú taldir af vegna flugslyss á Indlandi sem átti sér stað í gær. Á meðal þeirra látnu eru báðir flugmenn flugvélarinnar. Slysið varð með þeim hætti að 200 farþega flugvél Air India Express rann út af flugbraut í Kerala-héraði með skelfilegum afleiðingum. Vélin klofnaði í tvennt en um var að ræða Boeing 737-flugvél sem var á leið frá Dúbaí.
Fluginu var ætlað að koma Indverjum, sem voru fastir langt frá heimilum sínum vegna heimsfaraldurs kórónuveiru, heim.
Narendra Modi, forsætisráðherra Indlands, sagðist vera „sárþjáður“ vegna slyssins.
Björgunaraðgerðum á vettvangi er nú lokið og eftirlifendur hafa verið fluttir á sjúkrahús, að sögn ráðherrans Pinarayi Vijayan. Tugir særðust, þar af 156 alvarlega, að sögn embættismanna.
184 voru í flugvélinni, þar á meðal tíu ungbörn og sex manna áhöfn. Slysið varð klukkan 19:40 að staðartíma og hafði flugvélin áður reynt að lenda án árangurs en fyrri tilraun gekk illa vegna þungra monsún-rigninga. Stjórnvöld munu krefjast þess að rannsóknarstofa flugslysa á Indlandi muni rannsaka slysið.