88% lána einstaklinga í skilum
Setja bókamerki
88% lána einstaklinga í bankakerfinu voru í skilum þann 1. október síðastliðinn. Þetta kemur fram í nýjum upplýsingum frá Samtökum fjármálafyrirtækja sem kynntar voru í félags- og tryggingamálanefnd Alþingis í morgun. Upplýsingar eru miðaðar við 1. október 2010.
Þar kemur fram að rúm 40% þeirra sem eru í vanskilum í bankakerfinu eru á aldrinum 40-59 ára. Vanskilin eru mest hjá þeim sem eru fæstir í heimili, það er 1-2.
51% skuldara eða 46.395 lántakendur verðtryggðra íbúðalána hafa nýtt sér greiðslujöfnun. 949 lántakendur eru nú að nýta sér frystingarúrræði. Fjölmargir hafa nýtt það úrræði tímabundið. 2.522 lánþegar hafa nýtt sér greiðslujöfnun á erlendum lánum. 1.529 hafa fengið lækkun höfuðstóls á erlendum húsnæðislánum. 1.300 hafa fengið lækkun höfuðstóls á verðtryggðum húsnæðislánum. 1.510 hafa nýtt sér svokallaða 110% aðlögun höfuðstóls.
Um 450 manns hafa leitað eftir sértækri skuldaaðlögun. Þann 1. október voru 345 mál í vinnslu hjá aðildarfélögum SFF.
50.697 einstaklingar eða hjón eru með bílalán.
32.935 lántakendur eru með myntkörfulán og eiga von á endurútreikningi.
Á bilinu 60 – 75% lántakenda fá greiðsluseðla um næstu mánaðamót miðað við endurútreikning.
4.802 hafa nú þegar nýtt sér höfuðstólslækkun.
7.412 hafa nýtt sér greiðslujöfnun.
3.667 hafa fengið lækkun greiðslna ásamt lengingu lánstíma.
