Hljómsveitin Írafár og Icelandair, dótturfélag Flugleiða, undirrituðu í dag samstarfssamning þess efnis að Icelandair aðstoði sveitina í undirbúningi og upptökum á næstu plötu sveitarinnar. Ætlunin er að taka hana upp í Orlando núna í ágúst og mun sveitin halda til Orlando strax að lokinni verslunarmannahelgi.
Haft er eftir Birgittu Haukdal söngkonu Írafárs að hljómsveitin sé ekki að fara út í heim til að reyna að „meika það." „Þetta er íslensk plata á íslensku fyrir Íslendinga. Eina ástæðan fyrir því að við viljum gera þetta í útlöndum er að fá ró og næði til að geta einbeitt okkur að verkefninu," segir hún.
Fyrsta plata Írafárs var lang söluhæsta plata landsins á síðasta ári. Vignir Snær Vigfússon gítarleikari og lagahöfundur Írafárs var var búinn að semja öll lögin á plötuna í byrjun árs 2003 og voru 12 lög af 30 valin snemma í mars.
Þorvaldur Bjarni Þorvaldsson stjórnar upptökum á nýju plötunni og verður hann með í för til Bandaríkjanna.