Vinnuglaðar hendur á Litla- Hrauni eru margar en undanfarna mánuði hefur þar verið æ minni vinnu að fá. Fangarnir hafa því margir hverjir setið aðgerðalausir, en fá nú nokkrir að spreyta sig á nýju verkefni, í samstarfi við fyrirtækið SKSigló fyrir Ljósmyndasafn Siglufjarðar.
Safnið á mörghundruðþúsund ljósmyndir sem teknar hafa verið á Siglufirði eða af Siglfirðingum í gegnum tíðina og er bráð þörf á því að koma þeim í stafræna varðveislu með sem skipulegustum hætti.
SKSigló skrifaði því í gær undir samstarfssamning til 6 mánaða við Litla-Hraun um að þar á bæ tækju fangar að sér að skanna ljósmyndirnar inn á tölvu og frumskrásetja þar. Að sögn Finns Yngva Kristinssonar hjá SK Sigló kviknaði hugmyndin eftir fréttir um að fangar leituðu logandi ljósi að verkefnum eftir að bílnúmeraframleiðslan hrundi.