Norðaustanlands hvessir heldur þegar kemur fram á kvöldið, með skafrenningi og éljagangi. Reiknað er með hríðarveðri í nótt og fyrramálið, N 15-20 m/s og víða takmörkuðu skyggni.
Þá er búist við vaxandi hríðarveðri norðanlands þegar kemur fram á morguninn, en úrkomulítið verður norðvestantil á landinu fram eftir morgninum.
Vegir eru greiðfærir að heita má um allt sunnanvert landið.
Á Vesturlandi eru hálkublettir á Vatnaleið og á köflum yst á Snæfellsnesi en hálka á Fróðárheiði og Svínadal.
Á Vestfjörðum er víða nokkur hálka og sumstaðar snjóþekja s.s. á Klettshálsi og Þröskuldum. Þæfingsfærð er á Steingrímsfjarðarheiði og blint.
Það er hálka og snjóþekja og sumstaðar éljagangur á Norðurlandi, einkum þegar komið er austur fyrir Skagafjörð. Þæfingur er á Dettifossvegi.
Á Austurlandi er víða hálka eða snjóþekja. Öxi og Breiðdalsheiði eru ófærar.