Eliza Reid forsetafrú afhjúpaði Bleiku slaufuna en bleikur október hófst í dag. Form slaufunnar, sem hönnuð af Unni Eir og Lovísu gullsmiðum, táknar stuðningsnetið sem mikilvægast er þeim konum sem greinast með krabbamein - fjölskylduna og samfélagið. Athöfnin fór fram í Kringlunni í dag.
Bleika slaufan er árlegt átak Krabbameinsfélagsins sem í ár ber yfirskriftina „Fyrir mömmu.“ Sjónum er beint að brjóstakrabbameini, algengasta krabbamein íslenskra kvenna. Hér á landi greinist kona með brjóstakrabbamein á um 40 klukkustunda fresti árið um kring. Um 3.000 konur eru á lífi í dag sem greinst hafa með brjóstakrabbamein en enn látast um 40 konur úr sjúkdómnum á hverju ári.
Frétt mbl.is: Einföld skoðun bjargar lífi
Skipuleg leit er öflugasta vopnið í baráttunni og talið er að slík leit geti lækkað dánartíðni um allt að 40%. Brýn þörf er á að endurnýja tækjabúnað til skipulegrar leitar og því verður söfnunarfé Bleiku slaufunnar í ár varið til endurnýjunar á slíkum tækjabúnaði.
Bleika boðið verður haldið á 1. hæð Kringlunnar í kvöld, á góðgerðadeginum „Af öllu hjarta.“ Klukkan 17 munu Lalli töframaður og Ævar vísindamaður mæta á svæðið og klukkan 20 stíga fjölmargir listamenn á stokk, meðal annars Ari Eldjárn, Kristjana Stefáns og krakkar úr Bláa hnettinum, Gréta Salome og Glowie.
Opið verður í Kringlunni til klukkan 22 og gefa verslanir þar 5% af allri veltu dagsins til átaksins. Bleika slaufan verður einnig til sölu í verslunum Kringlunnar sem auk þess bjóða margvíslega afslætti til viðskiptavina.
Bleika slaufan kostar 2.000 krónur og verður hún seld á fjölda sölustaða án nokkurrar álagningar. Sölustaði Bleiku slaufunnar má finna á vefsíðu átaksins, www.bleikaslaufan.is.