Umhverfisvernd, vinátta, tilfinningar, sköpun og fjölmenning fléttuðust inn í undirbúningsvinnu barnanna í Blásölum fyrir uppskeruhátíð leikskólans í dag. Þau taka sig ljómandi vel út og eru afar stolt af öskudagsbúningum sínum, sem þau gerðu úr strigapokum, pappakössum, eggjabökkum og alls konar tilfallandi efnisafgöngum héðan og þaðan, sem ella hefði verið fleygt.
Eldsnemma í morgun mættu nokkrar Árórur til leiks í Blásölum, líka umhverfiströll, hreindýr og fjöldi lítilla norðurljósa, sem aðallega lýstust upp í yngri deildunum, þeirri Gulu og Bláu. Þessi fjölskrúðugi hópur, rúmlega sjötíu börn, skrýðist afrakstri vinnu sinnar, sem hófst í byrjun febrúar, og unnin var í hópastarfi.
Öll gegna börnin jafn mikilvægum hlutverkum á sannkallaðri uppskeruhátíð í tilefni dagsins. Haldið verður dansiball, kötturinn sleginn úr tunnunni og um leið hrynja úr henni pokar – úr náttúrulegu efni vitaskuld – fullir af snakki, og margt fleira verður til gamans gert.
Þetta er þriðja árið í röð sem börnin búa til sína eigin öskudagsbúninga undir styrkri handleiðslu leikskólastarfsmanna. Foreldrarnir hafa því hvorki þurft að spandera í rándýra prinsessukjóla- og kórónur, ofurhetjuskrúða eða aðra búninga af því taginu, né að reyna að töfra þá fram sjálfir með einhverjum hætti og mislögðum höndum.
Margrét Elíasdóttir leikskólastjóri segir börnin í Blásölum alveg sátt og raunar mjög ánægð og stolt af búningum sínum, þótt þeir séu úr strigapokum, pappakössum, eggjabökkum og alls konar efnisafgöngum héðan og þaðan, sem ella hefði verið fleygt. „Trúlega eru þau bara ánægðari fyrir vikið. Þau eru nefnilega orðin mjög meðvituð um umhverfi sitt, nýtni og endurvinnslu,“ segir hún.
Sjálf er hún eitt norðurljósanna og ekki síður spennt fyrir uppskeruhátíðinni en börnin. „Við höfum verið að vinna að Nordplus-verkefni í samstarfi við Svíþjóð, Noreg og Eistland. Verkefnið snýst m.a. um að styðja og efla læsi og skiptast löndin á að velja bók til umfjöllunar. Að þessu sinni völdu Norðmenn, frændur okkar, Chasing the Northern Lights, sem fjallar um Júlíu og vin hennar Ólaf tröllastrák, sem leggja ásamt fleirum í ferðalag til að leita að norðurljósunum. Á leiðinni hitta þau ævintýrapersónuna Áróru.“
Margrét segir bókina fjalla um umhverfisvernd, vináttu, tilfinningar og fjölmenningu; þemu sem fléttuðust inn í undirbúningsvinnuna fyrir uppskeruhátíðina á öskudaginn.
„Við lögðum sérstaka áherslu á að kosta engu til við gerð búninganna, nýta verðlaus efni og hlusta á hugmyndir barnanna um útfærslu þeirra. Foreldrarnir voru duglegir að vinna með okkur í efnisöflun og einnig nutum við velvildar verslana eins og Twill og Vogue. Við vorum ekkert að sníða eftir uppskriftum í saumablöðum, yfirleitt lögðust krakkarnir einfaldlega á efnið og við klipptum í kringum þau. Síðan annaðhvort saumuðum við efnin saman eða límdum, kræktum, heftuðum og festum saman með belti. Grímurnar gerðum við úr pappadiskum, sem við máluðum í öllum regnbogans litum og skreyttum stundum glimmeri eða öðru sem okkur hafði lagst til. Ekkert mjög flókið.“
Auk Nordplus-verkefnisins tekur Leikskólinn Blásalir þátt í alþjóðlegu verkefni til að auka umhverfismennt og styrkja umhverfisstefnu í skólanum. Síðan árið 2012 hafa Blásalir flaggað Grænfánanum með sóma og sann. Margrét kveðst vart þekkja til meiri umhverfisverndarsinna en Blásalabarnanna. „Eftir áramótin fórum við með börnin í eldri deildunum og tíndum rusl í stóra poka hérna í nágrenninu. Þau voru alveg í essinu sínu og eftir því sem pokarnir tútnuðu út urðu þau hneykslaðri á öllum umhverfissóðunum eins og þau sögðu full vandlætingar og voru ekkert að skafa utan af því,“ segir hún, stolt af sínu fólki.
Lengi býr að fyrstu gerð. Samkvæmt þessu má alveg binda vonir við að kynslóðin sem nú er á leikskólum landsins verði þeim sem eldri eru til fyrirmyndar og eftirbreytni í umgengni sinni við náttúruna í framtíðinni.
Leikskólinn Blásalir tekur þátt í samstarfsverkefninu Nordplus 2016-2018, ásamt leikskólum í Svíþjóð, Eistlandi og Noregi. Verkefnið nefnist The World of Storytelling. Markmiðið er að styðja og efla læsi, orðaforða, orðskilning, framsögn og hlustun. Unnið er með bók frá hverju landi eina önn. Í fyrra varð bókin Ástarsaga úr fjöllunum eftir Guðrúnu Helgadóttur, myndskreytt af Brian Pilkington, fyrir valinu, en í ár Chasing the Northern Lights eftir Norðmennina Cecillie Lanes og Ilze Dambe.
Að sögn Margrétar Elíasdóttur er unnið með sögurnar á ýmsan hátt, enda eru þær endalaus uppspretta umræðna og vangaveltna um vináttu, tilfinningar, fjölmenningu og umhverfisvernd sem og flesta þætti hins daglega lífs.