Lögreglan á höfuðborgarsvæðinu hefur farið fram á gæsluvarðhald yfir manninum og konunni sem voru handtekin í gær vegna rannsóknar á umfangsmikilli vændisstarfsemi.
Að sögn Snorra Birgissonar rannsóknarlögreglumanns er beðið eftir niðurstöðu dómara hjá Héraðsdómi Reykjavíkur í málinu.
Spurður hvort játning liggi fyrir segir hann lögregluna ekkert geta tjáð sig um það.
Um er að ræða sambýlisfólk á fertugsaldri. Þau eru bæði íslenskir ríkisborgarar en konan er af erlendum uppruna.
Lögreglan hefur engar upplýsingar um að þau hafi áður komið við sögu lögreglunnar.
Fólkið var yfirheyrt í gærkvöldi og svo fært fyrir dómara í hádeginu í dag.