Bæjarráð Mosfellsbæjar hefur hafnað beiðni Somos ehf. um að fá að reisa starfsmannabúðir fyrir erlenda starfsmenn á Leirvogstungumelum. Þykir slík starfsemi ekki samræmast gildandi deiliskipulagi á svæðinu.
Við afgreiðslu bæjarráðsins á málinu var bæjarstjóra jafnframt falið að ræða húsnæðismál erlends starfsfólks á vettvangi Sambands sveitarfélaga á höfuðborgarsvæðinu.
Morgunblaðið greindi frá áformum Somos í síðasta mánuði en þá kom fram að í fyrsta áfanga gætu risið starfsmannabúðir fyrir um 100 manns. Um er að ræða iðnaðarmenn frá Póllandi sem félagið hafi útvegað stórum verktökum hér á landi en mikil þörf sé á búsetuúrræðum fyrir þessa iðnaðarmenn.