Vinna við frumvarp til nýrra umferðarlaga stendur yfir í ráðuneyti samgöngumála en í því verður lögð til sú grundvallarbreyting frá gildandi lögum að mæling á mögulegri ávana- og fíkniefnaneyslu ökumanns, sem grundvöllur að ályktun um að hann teljist undir áhrifum slíkra efna og því óhæfur til að aka ökutæki, fari aðeins fram á blóði ökumanns
Þetta kemur fram í svari Sigurðar Inga Jóhannssonar samgönguráðherra við skriflegri fyrirspurn frá Helga Hrafni Gunnarssyni, þingmanni Pírata, þess efnis hvað liði vinnu að slíkum breytingum. Þar með, segir ennfremur í svarfinu, verði felld niður vísun til þess að mæling í þvagi geti verið nægur grundvöllur í þeim efnum. „Gert er ráð fyrir að drög að frumvarpi til nýrra umferðarlaga verði birt til umsagnar í samráðsgátt stjórnvalda á næstunni.“