Matvælastofnun hefur sent þvottabjörn, sem fannst við Hafnir á Reykjanesi í byrjun vikunnar, í sýnatöku og krufningu til Tilraunastöðvar Háskóla Íslands í meinafræði að Keldum.
Rannsakað verður hvort þvottabjörninn hafi borið dýrasjúkdóma með sér til landsins. Hundur sem komst í snertingu við dýrið hefur verið settur í einangrun á heimili sínu og sýni tekið úr honum.
Ekki er vitað hvernig þvottabjörninn barst til landsins, en innflutningur á þvottabjörnum er með öllu óheimill, að því er segir í tilkynningu frá Matvælastofnun.