Hvalfjarðargöngin verða lokuð í fimm nætur í þessari viku. Þetta er óvenju langur tími því auk vorhreingerningar og reglulegs viðhalds verður gerð allsherjarúttekt á ástandi mannvirkisins.
Úttektin tengist eigendaskiptunum í haust, þ.e. þegar ríkið tekur við rekstri ganganna af Speli. Fimmta og síðasta lokun verður aðfaranótt föstudags næstkomandi.
Sérfræðingar verkfræðistofunnar Mannvits gera úttekt á göngunum í samræmi við samning ríkisins og Spalar. Mannvitsmenn skoða og skrá sprungur í múrklæðningum, slit malbiks á akbrautum, ástand tæknibúnaðar og sitthvað fleira, segir í frétt á heimasíðu Spalar.
Inni í göngunum hafa múrarar frá Akranesi lagfært stóra skemmd í múrklæðningunni. Bílstjóri á ferð að næturþeli sofnaði undir stýri og ók á vegg ganganna. Hann meiddist sem betur fer ekki en bíllinn skemmdist mikið og gangaveggurinn sömuleiðis.