Kvenréttindadagur íslenskra kvenna er í dag en á þessum degi fyrir hundrað og þremur árum fengu konur 40 ára og eldri kosningarétt og kjörgengi til Alþingis.
Í tilefni dagsins var blómsveigur lagður að leiði Bríetar Bjarnhéðinsdóttur í Hólavallakirkjugarði við stutta athöfn þar sem þessarar merku konu og réttindabaráttu kvenna á Íslandi var minnst. Dóra Björt Guðjónsdóttir, verðandi forseti borgarstjórnar, lagði sveiginn að leiði Bríetar og flutti stutt ávarp og tónlistarkonan Ólöf Arnalds söng svo nokkur lög.
Enginn einn einstaklingur var áhrifameiri í baráttunni fyrir lagalegu jafnrétti kvenna á við karla en Bríet Bjarnhéðinsdóttir. Hún var einn mesti brautryðjandi íslenskar kvenréttindabaráttu og átti hún frumkvæðið að stofnun Kvenréttindafélags Íslands, Verkakvennafélagsins Framsóknar og Lestrafélags Kvenna í Reykjavík ásamt því að stofna og ritstýra Kvennablaðinu.