Íslenskur kvensjúkdómalæknir, Jón Ívar Einarsson, var hluti af teymi lækna á Indlandi sem græddu leg úr gjafa í ófrjóa konu í sjaldgæfri skurðaðgerð.
Sérsvið Jóns Ívars er kviðsjáraðgerðir, sem eru ívið minna inngrip fyrir konurnar að hans sögn. Skoðar hann nú að innleiða slíka legígræðslu með kviðsjáraðgerð á spítala sínum, Brigham and Women's Hospital við Harvard-háskóla.
Jón Ívar segir í umfjöllun Morgunblaðsins um málið í dag að aðgerðinni geti fylgt ýmsir fylgikvillar fyrir líffæragjafann. Hafa læknar því reynt að græða leg úr látnum eða heiladauðum konum í þær konur sem hafa ekkert leg eða ekki starfandi leg.
„Það væri að mörgu leyti skárra, í aðgerð sem gefur líffæri sem ekki er lífsnauðsynlegt.“ Að sögn Jóns Ívars hefur slík aðgerð ekki enn gengið en bundnar eru vonir við það í náinni framtíð.