Héraðsdómur Reykjavíkur hefur dæmt karlmann í 30 daga skilorðsbundið fangelsi fyrir að hafa veist með ofbeldi að öðrum manni í Mosfellsbæ og slegið hann ítrekað með krepptum hnefa í andlitið.
Afleiðingarnar urðu þær að maðurinn hlaut sár á innanverðri neðri vör, eymsli hægra megin á enni og í kringum kjálka, roða á brjóstkassa og tognun á hálsi, auk þess sem tönn í efri gómi losnaði tímabundið.
Maðurinn játaði brotið en atvikið átti sér stað 28. desember 2016.
Hann var einnig dæmdur til að greiða fórnarlambi sínu 288.700 krónur í skaða- og miskabætur með vöxtum en í einkaréttarmáli hafði verið krafist 538.700 króna í skaða- og miskabætur.
Ákærði var einnig dæmdur til að greiða kröfuhafa 150 þúsund krónur í málskostnað.