Sjálfsmynd, umhverfismál, stríð og ranghugmyndir um unglinga eru meðal þeirra málefna sem ungmenni úr grunnskólum Reykjavíkur munu kryfja á listrænan hátt á úrslitakvöldi Skrekks, hæfileikahátíðar skóla- og frístundasviðs Reykjavíkur.
Keppnin fer fram í Borgarleikhúsinu í kvöld klukkan 20.00 og verður sýnd í beinni útsendingu á RÚV, en þetta er í 30. sinn sem Skrekkur er haldinn.
„Skrekkur er ekki bara hæfileikakeppni heldur langt sköpunarferli, sem skapar vettvang fyrir listræna tjáningu ungs fólks,“ segir Harpa Rut Hilmarsdóttir, verkefnastjóri barnamenningar. Hún segir keppnina fela í sér heilbrigt starf sem kemur inn á marga þætti í lífi unglinganna. „Þau eru að tjá sig um það sem þeim þykir mikilvægast,“ segir hún.
Sjá viðtal við Hörpu Rut í heild á baksíðu Mmorgunblaðsins í dag.