Lögreglan á Suðurlandi hefur boðað út allar björgunarsveitir í A-Skaftafellssýslu og á Austurlandi til leitar að manni í Stafafellsfjöllum í Lóni.
Þetta kemur fram í Facebook-færslu lögreglunnar.
Þyrla Landhelgisgæslunnar er að lenda á Hornafirði og mun aðstoða við leitina.
Davíð Már Bjarnason, upplýsingafulltrúi Landsbjargar, segir að björgunarsveitum á suðausturhorninu hafi borist útkall um klukkan átta í kvöld. Ákvörðun hafi verið tekin að bæta í leitina þegar leið á kvöldið.
Alls eru nú um tíu hópar björgunarsveitafólks við leit en auk þess eru drónar nýttir til leitarinnar. Von er á sporhundum með þyrlu Landhelgisgæslunnar frá Reykjavík.