Pétur Magnússon
Engin innanlandssmit greindust í gær, en fjögur smit greindust við landamæri. Þetta staðfestir Þórólfur Guðnason sóttvarnalæknir í samtali við mbl.is.
Á síðustu vikum hefur stór hluti smita greinst við landamæri og því segist Þórólfur afar ánægður með nýjar sóttvarnareglur sem tóku gildi á landamærum í dag, en frá og með deginum í gær verður þeim sem koma til landsins gert skylt að fara í skimun á landamærum.
Þórólfur segir að reglurnar lágmarki hættuna á að smit berist til landsins, en mörg dæmi séu um að þeir sem hafi kosið að fara í 14 daga sóttkví í stað skimunar hafi ekki haldið sóttkví.
„Þarna voru miklir möguleikar á að við gætum fengið smit inn, og við vildum reyna að loka fyrir það, sérstaklega núna þegar útbreiðslan á faraldrinum erlendis er svona mikil og að það séu svona margir að greinast á landamærunum,“ segir Þórólfur.
Að sögn Þórólfs var um 1% þeirra sem komu til landsins smitað, en í sumum vélum var hlutfallið allt að 10%.
Ákveðið hefur verið að setja ekki áfram inn tölulegar upplýsingar um fjölda smita vegna Covid-19 um helgar.
Næstu tölur koma því inn á vefinn covid.is á mánudag, 18. janúar.