Þúsundir þátttakenda og forráðamanna eru nú á Akureyri vegna N1 mótsins í knattspyrnu. Mótið hófst sl. miðvikudag og lýkur síðdegis á morgun. KA sér um framkvæmd mótsins en alls taka um 200 lið þátt alls staðar að af landinu. Þátttakendur eru um 2 þúsund talsins talsins og til viðbótar má bæta við öðrum eins fjölda foreldra, foráðamanna, þjálfara og aðstoðarmanna. Er þetta stærsta N1 mótið til þessa, sem er það 36. í röðinni.
Mikil leikgleði er við völd í hverri viðureign, en keppnisskapið er ekki langt undan. Virðing er jafnframt borin fyrir andstæðingnum, eins og ein meðfylgjandi mynd ber með sér.
Í tilkynningu um mótið er haft eftir Sævari Péturssyni, framkvæmdastjóra KA, að mikið líf og fjör sé í kringum mótið. Síðustu tvö mót hafi einkennst af ýmsum takmörkunum og reglum vegna Covid-19. Því sé nú fagnað í ár að þátttakendur geti sleppt af sér beislinu, takmarkalaust.