Landsréttur þyngdi í dag dóm yfir Davíð Nikulássyni fyrir tilraun til manndráps með því að hafa ráðist að öðrum manni með exi og lagt til hans í höfuð og búk. Hlaut maðurinn opinn skurð frá miðju enni að hársrót, brot á höfuðkúpu og andlitsbeinum. Einnig annan skurð yfir enni, þriðja yfir brjóstkassa og fjórða á hægri upphandlegg. Þá var maðurinn jafnframt sakfelldur fyrir vopnalagabrot með því að hafa haft fjölda vopna í fórum sínum.
Áður hafði Héraðsdómur Reykjaness dæmt manninn í fjögurra og hálfs árs fangelsi, en Landsréttur þyngdi þann dóm um eitt ár. Þá voru bætur jafnframt hækkaðar úr 1,5 milljón í 2 milljónir, auk þess sem Davíð þarf að greiða allan málskostnað, samtals um 4 milljónir fyrir báðum dómsstigum.
Davíð fór fram á sýknu og sagði öxina hafa hrokkið í andlit hins mannsins þegar hann reyndi að taka öxina af Davíð. Tóku dómstólarnir ekki undir þessa skýringu og segir þar að eggvopni hafi verið beitt gegn manninum. Segir í dómi Landsréttar að Davíð hafi framið lífshættulegan verknað og ljóst að „hending ein réði að ekki hlaust bani af.“
Árásin átti sér stað 31. október 2020, en tilkynnt var um árásina að kvöldi þess dags. Þegar lögregla kom á staðinn var maðurinn úti í garði ásamt tveimur íbúum hússins, en hann greindi lögreglu frá því að Davíð hefði slegið sig í höfuðið með öxi. Blæddi mikið úr sári á höfði mannsins og var hann þakinn í blóði.
Auk axarinnar fundust í íbúð mannsins tveir hnífar, annar með 17 cm blaði og hinn með 13,5 cm blaði, tveir kasthnífar, fjaðrahnífur og sverð. Lagði lögreglan hald á þessa muni. Báðir mennirnir voru undir áhrifum fíkniefna þetta kvöld.
Mennirnir höfðu verið saman í íbúðinni sem var í eigu Davíðs. Sagðist hann hafa verið að sýna hinum hinum ýmsa safnmuni sem hann ætti, meðal annars hringabrynju, vopn og fleira. Hefði maðurinn handleikið öxina en rekið hana í mun úr fílabeini og við það hefði Davíð reiðst mikið sem leiddi til átakanna.
Hinn maðurinn sagði hins vegar að þeir hefðu verið að drekka í herberginu og að Davíð hefði talið sig hafa stolið af honum lyfjum. Hefði Davíð tekið öxina og farið að höggva í borðplötu og þá hefði hann tekið öxina af Davíð og lagt hana á borðið. Við það hafi hann rekist í fílabeinsstyttuna og við það hafi Davíð reiðst mjög og ráðist á sig.