Skrifuðu undir langtímastefnu fyrir norrænt varnarsamstarf

Ný langtímastefna fyrir norrænt varnarsamstarf (NORDEFCO) til ársins 2030 var undirrituð á fundi varnarmálaráðherra Norðurlandanna sem lauk í Þórshöfn í dag.

Þá ræddu ráðherrarnir um mikilvægi áframhaldandi stuðnings til Úkraínu og þróun öryggismála á Norður-Atlantshafi og norðurslóðum. Að þessu sinni áttu fulltrúar stjórnvalda í Færeyjum og Grænlandi einnig sæti á fundinum. Þetta kemur fram í tilkynningu frá Stjórnarráðinu. 

Rík samstaða um stuðning við varnarbaráttu Úkraínu 

Stefnunni er ætlað að mæta nýjum öryggisáskorunum, efla sameiginlega varnargetu og öryggi ríkjanna sem og framlag þeirra innan Atlantshafsbandalagsins. Sem fyrr var rík samstaða á fundinum um mikilvægi þess að styðja áfram við varnarbaráttu Úkraínu, en ríkin hafa til þessa lagt fram um 13 milljarða evra í varnartengdan stuðning til handa Úkraínu.

„Fundurinn hér í Þórshöfn var um margt sögulegur. Við höfum markað nýja framtíðarstefnu fyrir norrænt varnarsamstarf við gjörbreyttar aðstæður í öryggismálum og nú með öll Norðurlöndin innan vébanda Atlantshafsbandalagsins. Samstarf ríkjanna hefur eflst mjög hratt á síðustu árum með virkri þátttöku Íslands. Gott og náið samstarf Norðurlandanna eykur öryggi íbúa þjóðanna og styrkir um leið framlag þeirra til sameiginlegra varna Atlantshafsbandalagsins,“ er haft eftir Þórdísi Kolbrúnu Reykfjörð Gylfadóttur utanríkisráðherra í tilkynningunni 

Þróun öryggismála á norðurslóðum og Norður-Atlantshafi hefur verið á oddinum í tíð formennsku Danmerkur í NORDEFCO og voru þau mál því ofarlega á baugi á fundi varnarmálaráðherranna. Svæðið hefur vaxandi öryggispólitískt vægi fyrir Evrópu og Norður-Ameríku og ráðherrarnir sammála um mikilvægi þess að viðhalda stöðuvitund, fælingu og vörnum á svæðinu.

• Blogga um frétt