Prestar í Rúmeníu eru sagðir farnir að blessa bifreiðar fyrir eigendur þeirra, sem telja að þær verði öruggari í umferðinni fyrir vikið. Sérstakar athafnir eru haldnar við Calugareni, nærri Búkarest, þar sem vatni, sem prestar hafa blessað, er skvett á vélar, sæti og bifreiðirnar sjálfar, að því er fram kemur á ananova.com.
Valeriu Laurentiu, rúmenskur prestur, segir að sífellt fleiri komi hvaðanæva frá Rúmeníu til þess að láta blessa bifreiðir sínar. Hann segir að mikil eftirspurn sé eftir slíkum athöfnum og kveðst framkvæma blessun sem notuð var þegar skip voru blessuð áður en þau héldu til hafs.
Laurentiu segist vona að athafnir sínar stuðli að færri umferðarslysum í landinu.