Jen og Ben sundur og saman á ný

Svo virðist sem leikarinn Ben Affleck og leik- og söngkonan Jennifer Lopez séu tekin saman aftur. Ritstjórnir bandarískra blaða hafa verið á öðrum endanum í dag við að reyna að ná sambandi við dómshús í Georgíu eftir að hjónaleysin sáust þar í gær.

Mestumrædda par Hollywood kveikti í slúðurblaðamönnum þegar þau birtust í dómshúsi í Georgíu í gær skammt frá heimili Afflecks. En það var þó ekki leyfi til giftingar sem þau voru að sækja um heldur mun leikarinn föngulegi hafi verið að sækja um byssuleyfi.

„Affleck vildi vita hvort hann gæti fengið byssuleyfi,“ sagði starfsmaður réttarins í samtali við AP-fréttastofuna.

Í kjölfarið hefur litli bærinn Hinesville fyllst að áköfum ljósmyndurum og blaðamönnum sem sérhæfa sig í fréttum af fræga fólkinu. Þreytulegur starfsmaður réttarins staðfesti í morgun - greinilega ekki í fyrsta sinn - að parið hefði ekki verið að sækja um leyfi til að gifta sig.

Affleck og Lopez höfðu ákveðið að gifta sig 14. september síðastliðin en aflýstu brúðkaupinu á síðustu stundu.

• Blogga um frétt