Þýskur dómstóll hefur hafnað kröfum manns um ríkisstyrki svo honum sé kleift að heimsækja vændishús fjórum sinnum í mánuði í því skyni að tryggja andlega og líkamlega vellíðan, meðan kona hans er erlendis.
Maðurinn sem er 35 ára og atvinnulaus, sóttist eftir 2.000 evra styrk á mánuði, sem samsvarar rúmum 170 þúsund íslenskum krónum, til þess að fjármagna ferðir sínar á vændishús og til kaupa á 8 klámmyndböndum og fyrir ferðakostnaði til og frá myndbandasölustaðnum.
Hann fór í mál við þýska ríkið, eftir að yfirvöld neituðu að greiða fargjald taílenskrar konu hans frá Taílandi til Þýskalands.
Dómstóllinn hafnaði kröfum mannsins á þeim forsendum að atvinnuleysisbætur eigi að tryggja að fólk geti keypt daglegar nauðsynjavörur fyrir bæturnar.
Gerhard Schröder, kanslari Þýskalands, stendur nú í niðurskurðaraðgerðum á þýska velferðarkerfinu, en þrátt fyrir þetta hafa þýskir dómstólar nýlega komist að niðurstöðum í málum bótaþega sem eru þeim í vil. Til dæmis var þýska ríkinu í ágúst í fyrra, gert að greiða Víagra töflur, sem draga eiga úr getuleysi, en atvinnulaus maður hafði sóst eftir að ríkið greiddi fyrir Víagra lyf sín.