Ný rannsókn hefur leitt í ljós að karlmenn séu líklegri til að segja ósatt heldur en konur. Konur eru hins vegar líklegri til að finna til sektarkenndar yfir því að hafa logið.
Þátttakendur í rannsókninni voru 3.000 talsins, að því er fram kemur á vef breska útvarpsins. Í ljós kom að breskur meðaljón segir ósatt þrisvar sinnum á dag. Þetta jafngildi 1.092 lygum á hverju ári.
Skv. rannsókninni eru konur heiðarlegri, en meðalkonan segir ósatt tvisvar sinnum á dag. Þetta gerir 728 skipti árlega.
Fram kemur í rannsókn Science Museum að oftast sé logið að mæðrum. Um fjórðungur breskra karla segist t.a.m. hafa logið að mæðrum sínum. Aðeins um 20% breskra kvenna viðurkenna þetta.
Til samanburðar má nefna að 10% þátttakenda viðurkenndu að þeir væru líklegir til að ljúga að makanum.
Karlar eru líklegri til að segja ósatt um drykkjuvenjur sínar. „Ég drakk ekki svo mikið“ er vinsæl lína á meðal karla.
Konur eru hins vegar líklegri til að segja ósatt um sínar tilfinningar. „Það er ekkert að, það er í lagi með mig“ er lygi sem er algengust meðal kvenna, skv. rannsókninni.