Ísland er komið með 12 stig eftir fimm leiki í A-riðli undankeppni Evrópumóts karla í knattspyrnu eftir sannfærandi sigur á Kasakstan, 3:0, á Astana Arena leikvanginum í Astana í dag. Eiður Smári Guðjohnsen og Birkir Bjarnason skoruðu í fyrri hálfleiknum og Birkir bætti öðru við á 90. mínútu leiksins.
Ísland nær því Tékkum að stigum á toppi riðilsins, allavega í bili, en leikur þeirra við Lettland er að hefjast núna klukkan 17. Holland er með 6 stig, Tyrkland 4, Lettland 2 og Kasakstan eitt. Holland og Tyrkland mætast í kvöld.
Leikurinn var jafn til að byrja með og Kasakar gerðu sig líklega um tíma en þeir voru hættulegir í uppstilltum atriðum og náðu að setja pressu á íslenska liðið.
En beint í kjölfarið á því komst Ísland yfir á 20. mínútu. Mistök hja Andrei Sidelnikov markverði, Jóhann Berg Guðmundsson komst inní spyrnu hans frá markinu, sendi inn að vítapunkti á Eið Smára Guðjohnsen sem renndi boltanum yfirvegað með jörðu í vinstra hornið, 0:1.
Íslenska liðið lét kné fylgja kviði og á 32. mínútu tók Gylfi Þór Sigurðsson aukaspyrnu hægra megin á vellinum. Hann sendi boltann innað vítapunkti og þar var Birkir Bjarnason mættur og skoraði með góðum skalla, 0:2.
Kári Árnason fékk tvö góð færi til að skora, sitthvoru megin við annað markið, en skallaði í bæði skiptin framhjá eftir hornspyrnur Gylfa.
Seinni hálfleikur var rólegri en sá fyrri og íslenska liðið hélt ágætum tökum á honum lengst af en Kasakar áttu þó hættulegar rispur inná milli.
Engu munaði að Renat Abdulin minnkaði muninn á 63. mínútu þegar hann skallaði í stöng íslenska marksins eftir aukaspyrnu frá hægri. Kasakstan náði nokkurri pressu um tíma en hún fjaraði út og Ísland náði aftur ágætum tökum á leiknum. Dauðafærin voru þó engin en nokkur ágæt skot að marki.
Aron Einar Gunnarsson fyrirliði fór af velli á 72. mínútu og virtist hafa meiðst á hönd.
Birkir Bjarnason skoraði svo þriðja markið á 90. mínútu eftir skyndisókn og sendingu frá Jóni Daða Böðvarssyni.
Kasakstan fékk dauðafæri eftir það en íslensku varnarmennirnir björguðu á síðustu stundu í markteignum.