Íslenska U19 ára landslið karla vann góðan 2:0 sigur á Norður-Írlandi er liðin mættust í vináttuleik á Samsung-vellinum í Garðabæ í kvöld.
Albert Guðmundsson, sem leikur með PSV Eindhoven í Hollandi, skoraði bæði mörk íslenska liðsins en það fyrra kom um það bil fimmtán mínútum fyrir leikslok áður en hann bætti við öðru úr vítaspyrnu undir blálokin.
Þetta var fyrri leikur þessara liða en síðari leikurinn fer fram á sunnudaginn á K&G-vellinum í Sandgerði.
Albert hefur leikið 20 landsleiki fyrir yngri landslið Íslands og gert samtals 7 mörk í þeim.