Kínverska kvennalandsliðið í knattspyrnu stóð uppi sem sigurvegari á fjögurra þjóða móti sem lauk í Chongqing-héraði í Kína í dag. Ísland hafnaði í þriðja sæti mótsins.
Kína vann Danmörku 1:0 í lokaleiknum í dag og fékk alls sjö stig eftir sigur á Úsbekistan á laugardag og 2:2 jafntefli við Ísland á fimmtudag. Danir enduðu í öðru sæti með sex stig eftir að hafa unnið Úsbeka og lið Íslands.
Ísland fékk fjögur stig, eitt fyrir jafnteflið gegn Kína og þrjú fyrir sigurinn á Úsbekum í dag, en liðið tapaði fyrir Dönum á laugardag. Úsbekistan tapaði öllum sínum leikjum.