Talsverðar líkur eru á að Kristinn Steindórsson gangi til liðs við knattspyrnulið FH-inga, sem boðað hefur til blaðamannafundar í dag. Gangi það eftir, verður Hafnarfjarðarliðið búið að styrkja sig allverulega fyrir komandi keppnistímabil.
FH-ingar höfnuðu í þriðja sæti Pepsi-deildar karla í ár og urðu að sætta sig við það í fyrsta skipti frá 2002 að enda ekki í öðru tveggja efstu sætanna á Íslandsmótinu.
Þeir ætla greinilega ekki að láta það gerast aftur og hafa nú þegar náð sér í góðan liðsauka en tveir leikmenn hafa snúið heim úr atvinnumennsku og samið við FH-inga. Hjörtur Logi Valgarðsson er kominn til þeirra á ný eftir sjö ár á Norðurlöndunum, síðast með Örebro í Svíþjóð, og Guðmundur Kristjánsson, fyrrverandi leikmaður Breiðabliks, er kominn í Kaplakrika eftir sex ár hjá Start í Noregi.
Nánar er fjallað um breytingarnar hjá FH í íþróttablaði Morgunblaðsins sem kom út í morgun.