Íslenska U19 ára landslið karla í fótbolta vann flottan 5:2-sigur á Grikklandi í öðrum leik sínum í undankeppni Evrópumótsins Í Belgíu í dag. Íslenska liðið er með þrjú stig eftir tvo leiki, en liðið tapaði fyrir Belgíu í fyrstu umferð.
Fylkismaðurinn Orri Hrafn Kjartansson sem leikur með Heerenveen skoraði eina mark fyrri hálfleiks á 19. mínútu og Valgeir Valgeirsson, sem gerði góða hluti með HK í úrvalsdeildinni í sumar, bætti við marki á 57. mínútu.
Kristall Máni Ingason, leikmaður FC Köbenhavn og áður Fjölnis, bætti við þriðja marki Íslands á 61. mínútu og Skagamaðurinn Ísak Bergmann Jóhannesson, 16 ára leikmaður Norrköping, gerði það fjórða á 66. mínútu, áður en Kristall bætti við sínu öðru marki á 73. mínútu.
Grikkir klóruðu í bakkann með tveimur mörkum á síðustu ellefu mínútunum og þar við sat.
Ísland mætir Albaníu í lokaleik sínum í riðlinum á þriðjudaginn kemur og stendur nú vel að vígi með að komast áfram í milliriðil en þangað fara tvö efstu liðin. Belgía er með 6 stig, Ísland 3, Grikkland 3 og Albanía ekkert fyrir lokaumferðina. Sigur á Albönum kemur íslenska liðinu örugglega áfram og liðið gæti jafnvel sloppið með tap ef Grikkir tapa fyrir Belgum.
Byrjunarlið Íslands:
Jökull Andrésson
Valgeir Valgeirsson
Atli Barkarson
Teitur Magnússon
Andri Fannar Baldursson
Andri Lucas Guðjohnsen
Kristall Máni Ingason
Baldur Hannes Stefánsson
Jón Gísli Eyland Gíslason
Ísak Bergmann Jóhannesson
Orri Hrafn Kjartansson