Evrópumeistarar Þjóðverja höfðu betur gegn Ítölum, 2:1, í síðari leik B-riðilsins á Evrópumóti kvenna í knattspyrnu í Hollandi í kvöld þar sem Ítalir léku manni færri í rúmar 20 mínútur.
Josephine Henning kom Þjóðverjum yfir á 19. mínútu þegar hún skallaði boltann í autt markið eftir að markvörður Ítala hafði gripið í tómt þegar hún hugðist grípa boltann eftir fyrirgjöf. Ilaria Mauro jafnaði metin fyrir Ítalíu tíu mínútum síðar.
Babett Peter kom Evrópumeisturum í forystu með marki úr vítaspyrnu sem dæmd var á markvörð Ítala og tveimur mínútum síðar fékk Elisa Bartoli að líta sitt annað gula spjald og var þar rekin af velli. Eftir það var á brattann að sækja fyrir ítalska liðið sem með þessum úrslitum kemst ekki í átta liða úrslitin en Ítalir töpuðu fyrir Rússum í fyrsta leik sínum á mótinu.
Þýskaland og Svíþjóð eru með 4 stig, Rússland 3 og Ítalía ekkert.