Michael Owen, fyrrverandi leikmaður Manchester United, er undrandi á að Wayne Rooney skyldi ekki hafa tekið báðar vítaspyrnurnar sem United fékk í leiknum á móti Fenerbache í Evrópudeildinni í gærkvöld.
„Þetta pirrar mig. Rooney hefði átt að taka bæði vítin. Fyrir tólf árum síðan spilaði hann sinn fyrsta leik fyrir United og það var á móti Fenerbache. Þá tók hann boltann af af Ryan Giggs og skoraði þrennu í leiknum. Hefði hann skorað úr vítunum þá væri hann bara einu marki frá markameti Sir Bobby Charlton,“ sagði Owen í viðtali við BT Sports eftir leikinn.
„Ég man þegar hann var yngri. Þá var hann æstur í að skora mörk. Fái liðið víti á hann að vera sá fyrsti sem vill taka það. Ég trúi því ekki að hann hafi gefið þau frá sér,“ sagði Owen.
Paul Pogba fór á vítapunktinn og skoraði úr fyrra vítinu á Old Trafford í gær og Anthony Martial skoraði úr síðara vítinu.
Pogba sagði eftir leikinn að hann hefði sagt Rooney að hann vildi taka vítið og að Rooney hafi rétt sér boltann.