José Mourinho, knattspyrnustjóri Manchester United, hefur samkvæmt enskum fjölmiðlum sagt United að liðið eigi ekki að eltast við Portúgalann Cristiano Ronaldo, heldur eigi það að leggja allt kapp á að næla í annan sóknarmann.
Mourinho vill fylla upp í skarðið sem Zlatan Ibrahimovic skilur eftir sig og Sunday Express fullyrðir að Mourinho vilji að United geri tilboð í Harry Kane sem Tottenham geti ekki hafnað. Kane varð markakóngur ensku úrvalsdeildarinnar á nýliðinni leiktíð en hann skoraði 29 mörk.
Ronaldo hefur verið orðaður við endurkomu á Old Trafford síðan fréttir bárust af því að hann vildi yfirgefa Real Madrid. Mourinho er hins vegar frekar sagður vilja krækja í Kane heldur en Ronaldo.