Spænski framherjinn Alvaro Morata spilar á morgun sinn fyrsta leik með Chelsea þegar liðið mætir þýsku meisturunum í Bayern München í Singapúr.
Chelsea gekk fyrir helgina á kaupunum á Morata frá Real Madrid og verður hann í treyju númer 9 á komandi leiktíð. Antonio Conte, stjóri Chelsea, bindur miklar vonir við Morata og segir að hann hafi alla burði til að gera það gott í ensku úrvalsdeildinni.
„Morata er ungur leikmaður sem hefur öðlast mikla reynslu á sínum ferli. Hann hefur spilað með stórliðum Real Madrid og Juventus og hefur spilað marga erfiða leiki í Meistaradeildinni og vann hana á síðustu leiktíð. Hann er klár og ég er ekki í nokkrum vafa um að hann á eftir að gera það gott í ensku úrvalsdeildinni,“ segir Conte.