Enska B-deildarfélagið Leeds United hefur samþykkt tilboð úrvalsdeildarfélagsins Burnley upp á 15 milljónir punda fyrir nýsjálenska framherjann Chris Wood. Leikmaðurinn er mættur til Manchester, þar sem hann mun gangast undir læknisskoðun.
Wood skoraði 30 mörk fyrir Leeds á síðustu leiktíð og var markakóngur í B-deildinni. Hann á að baki 52 landsleiki fyrir Nýja-Sjáland og hefur hann skorað í þeim 20 mörk.
Jóhann Berg Guðmundsson leikur með Burnley og hefur hann verið í byrjunarliðinu í báðum leikjum liðsins í ensku úrvalsdeildinni til þessa.