Hörður Björgvin Magnússon, landsliðsmaður í knattspyrnu, baðst afsökunar á mistökunum sem hann gerði þegar lið hans Bristol City tapaði fyrir Manchester City í undanúrslitum enska deildabikarsins í knattspyrnu í gærkvöld.
Hörður reyndi að skýla boltanum upp við endamörkin en ekki vildi betur til en að Bernardo Silva náði að stela boltanum af honum, kom honum til Leroy Sané sem skoraði með föstu skoti. Hörður var svo tekinn af velli í hálfleik.
„Þetta var stórt kvöld fyrir okkur. Við höfum komist svo langt og sýndum fólki hvað við í okkur er spunnið. Ég biðst innilegrar afsökunar á mistökum mínum og mun læra af þeim. Nú einbeitum við okkur að deildinni og ég vil gera mitt besta fyrir félagið sem mér er kært,“ skrifaði Hörður á Twitter-síðu sína eftir leik.
Tonight was a big night for us. We made it so far and showed everyone we are capable of greater things. I’m truly sorry for my mistake tonight and will learn from it. Now we focus on the league and do my best for a club I care about. Up the City ⚪️🔴 #MakingBristolProud
— Hörður B. Magnússon (@HordurM34) January 23, 2018