José Mourinho, knattspyrnustjóri Manchester United, vonast til þess að endurheimta eitthvað af þeim leikmönnum sem misstu af bikarleiknum gegn Huddersfield þegar liðið sækir Sevilla heim í fyrri leik liðanna í 16-liða úrslitum Meistaradeildarinnar á miðvikudaginn.
Marcus Rashford, Antonio Valencia, Ander Herrera, Phil Jones, Marcos Rojo, Marouane Fellaini og Zlatan Ibrahimovic voru fjarri góðu gamni í leiknum á móti Huddersfield á laugardaginn vegna meiðsla og Paul Pogba spilaði ekki vegna veikinda.
„Það er möguleiki á að Rashford, Herrera og Valencia verði klárir en ég veit ekki um Pogba. Rojo, Jones, Fellaini og Zlatan eiga litla möguleika á að vera með okkur gegn Sevilla,“ segir Mourinho en eftir leikinn gegn Sevilla tekur United á móti Chelsea í afar mikilvægum leik í toppbaráttu deildarinnar.