Knattspyrnufélögin Liverpool og Roma hafa komist að samkomulagi um að enska félagið borgi 70 milljónir evra fyrir brasilíska markmanninn Alisson og samkvæmt fyrrverandi þjálfara ítalska liðsins er um kostakaup að ræða.
Hinn 25 ára gamli Alisson lék 37 leiki í ítölsku deildinni á síðustu leiktíð eftir að hafa hafið ferilinn hjá Internacional í heimalandinu og lék alla leiki Brasilíu á HM í Rússlandi í sumar. Roberto Negrisolo, sem var markmannsþjálfari hjá Roma þegar Alisson kom til félagsins, segir fólk ekki átta sig á því, hversu góður sá brasilíski er.
„Þetta verður metfé fyrir markvörð en fólk áttar sig ekki enn á því hver Alisson er. Strákurinn er ótrúlegt fyrirbæri, hann er númer eitt af þeim sem eru númer eitt!“ sagði Negrisolo spenntur.
„Hann er Messi markvarðanna vegna þess að hann hefur sama hugarfar og Lionel Messi. Hann verður besti markmaður sinnar kynslóðar.“