Forráðamenn Manchester United eru sannfærðir um að markvörðurinn David de Gea skrifi undir nýjan langtímasamning við félagið.
Spánverjinn á eitt ár eftir af samningi sínum á Old Trafford en United getur lengt hann um eitt aukaár. Félagið vill þó hefja nýjar samningsviðræður við 27 ára landsliðsmarkvörðinn og hefur samningsstaða þeirra styrkst eftir að stórlið Real Madrid á Spáni keypti Thibaut Courtois frá Chelsea í síðustu viku.
De Gea var sífellt orðaður við Real frá árinu 2015 en seinagangur í faxvél varð til þess að pappírar vegna félagsskipta hans til Spánar voru einhverjum mínútum of seinir í gegn það sumarið. Örfáum vikum síðar skrifaði hann undir nýjan samning hjá United.
Í ljósi þess að Real Madrid hefur nú keypt Belgann Courtois ætti fátt að standa í vegi fyrir að De Gea skrifi undir hjá enska félaginu en hann er sagður ánægður á Old Trafford. Hann gekk til liðs við United árið 2011 og hefur spilað alls 316 leiki fyrir félagið. Þá hefur hann verið valinn í lið ársins á Englandi fimm sinnum, þar af síðustu fjögur ár.