Eiður Smári Guðjohnsen hrósaði N'Golo Kanté, miðjumanni enska knattspyrnufélagsins Chelsea, í hástert í Vellinum á Símanum Sport í kvöld.
Kanté hefur gengið í gegnum endurnýjun lífdaga hjá Chelsea síðan að Thomas Tuchel tók við stjórnartaumunum hjá félaginu af Frank Lampard í lok janúar.
Chelsea hefur verið á miklu skriði en liðið er komið í úrslit bikarkeppninnar á Englandi og úrslit Meistaradeildarinnar.
„Það er eins og N'Golo Kanté sé á vespu inni á vellinum, hann er alls staðar og kemur með þvílíka orku inn í liðið,“ sagði Eiður.
„Það er ótrúleg breidd í leikmannahópnum og það er fullt af flottum leikmönnum þarna sem munu hugsanlega stíga enn stærra skref fyrir næstu leiktíð,“ bætti Eiður Smári við.