Lykilmaður Liverpool í samningaviðræður

Egypski knattspyrnumaðurinn Mohamed Salah er á leið í samningaviðræður við forráðamenn enska úrvalsdeildarfélagsins Liverpool um nýjan samning.

Það er The Athletic sem greinir frá þessu en í frétt miðilsins kemur meðal annars fram að Richard Hughes, nýr íþróttastjóri félagsins, mun leiða viðræðurnar við Salah.

Frétt af mbl.is

Salah ekki á förum í sumar?

Salah, sem er 31 árs gamall, gekk til liðs við Liverpool frá Roma sumarið 2017 fyrir 37 milljónir punda en hann hefur skorað 210 mörk og lagt upp önnur 88 í 346 leikjum fyrir félagið í öllum keppnum.

Núgildandi samningur hans við Liverpool rennur út sumarið 2025 en hann hefur verið sterklega orðaður við félög í Sádi-Arabíu að undanförnu.

Liverpool hafnaði nokkrum himinháum tilboðum í Salah síðasta sumar frá félögum í Sádi-Arabíu en nú bendir allt til þess að hann verði áfram á Anfield.

• Blogga um frétt