Jenson Button hjá McLaren ók hraðast á fyrstu æfingu kínversku kappaksturshelgarinnar í Sjanghæ í nótt að íslenskum tíma. Mál málanna var þó furðulegt óhapp Sebastien Buemi hjá Toro Rosso sem þakka má hversu vel hann slapp.
Atvikið er með því furðulegra sem lengi hefur sést í formúlu-1. Svo virtist sem fjöðrunarbúnaður hafi splundrast er Buemi kom inn á bremsusvæði í lok langs beins kafla er um 15 mínútur voru eftir af æfingunni. Framhjólin losnuðu bæði samtímis af Toro Rosso bílnum sem þeyttist áfram og nam loks staðar við öryggisvegg í sandgryfju.
Eftir það hleypti liðið hinum ökuþór sínum, Jaime Alguersuari, ekki úr bílskúrnum vegna rannsóknar sinnar á óhappinu.
McLarenmenn virtust njóta búnaðar í bílnum er eykur beinlínuhraða hans með því að rjúfa vængpressu afturvængs. Lengi vel sátu Button og Lewis Hamilton í efstu sætum tímalistans en á síðustu mínútum komst Nico Rosberg hjá Mercedes upp á milli þeirra.
Eftir að brautin var opnuð á ný í kjölfar óhapps Buemi setti Michael Schumacher hjá Mercedes fjórða besta tímann.
Sebastian Vettel hjá Red Bull átti fimmta besta tímann og næstu tvö sæti fylltu Renaultþórarnir Roberet Kubica og Vitaly Petrov. Var það reyndar ekki fyrr en á lokasekúndunni sem Kubica komst upp fyrir Petrov.
Fernando Alonso hafði ekki sett tíma, aðeins ekið úthringi til prófunar bílkerfum sínum er hann varð að leggja Ferrarifáknum við brautarkant vegna vélarbilunar.
Niðurstaða æfingarinnar varð annars sem hér segir:
Röð | Ökuþór | Bíll | tími | Bil | Hri. |
---|---|---|---|---|---|
1. | Button | McLaren | 1:36.677 | 15 | |
2. | Rosberg | Mercedes | 1:36.748 | +0.071 | 17 |
3. | Hamilton | McLaren | 1:36.775 | +0.098 | 19 |
4. | Vettel | Red Bull | 1:37.509 | +0.832 | 14 |
5. | Kubica | Renault | 1:37.601 | +0.924 | 20 |
6. | Petrov | Renault | 1:37.716 | +1.039 | 17 |
7. | Schumacher | Mercedes | 1:37.745 | +1.068 | 25 |
8. | Webber | Red Bull | 1:37.980 | +1.303 | 17 |
9. | Sutil | Force India | 1:38.008 | +1.331 | 13 |
10. | Massa | Ferrari | 1:38.098 | +1.421 | 19 |
11. | Alguersuari | Toro Rosso | 1:38.161 | +1.484 | 19 |
12. | Kobayashi | Sauber | 1:38.375 | +1.698 | 21 |
13. | de la Rosa | Sauber | 1:38.421 | +1.744 | 19 |
14. | Hulkenberg | Williams | 1:38.569 | +1.892 | 20 |
15. | di Resta | Force India | 1:38.618 | +1.941 | 26 |
16. | Barrichello | Williams | 1:38.678 | +2.001 | 17 |
17. | Buemi | Toro Rosso | 1:39.939 | +3.262 | 5 |
18. | Trulli | Lotus | 1:41.531 | +4.854 | 22 |
19. | Kovalainen | Lotus | 1:41.779 | +5.102 | 23 |
20. | Glock | Virgin | 1:41.830 | +5.153 | 20 |
21. | di Grassi | Virgin | 1:42.181 | +5.504 | 27 |
22. | Senna | HRT | 1:43.875 | +7.198 | 23 |
23. | Chandhok | HRT | 1:43.949 | +7.272 | 20 |
24. | Alonso | Ferrari | enginn tími | 6 |