UEFA hefur kært Galatasaray, Dortmund og Basel vegna óláta stuðningsmanna liðanna á leikjum þeirra í Meistaradeild Evrópu í knattspyrnu í gær.
Í ólátunum fólst meðal annars að kveikt var á blysum og þeim ásamt fleiri hlutum kastað í átt að vellinum.
Málin verða tekin fyrir þann 16. október af aganefnd UEFA en næstu leikir liðanna í Meistaradeildinni fara fram í vikunni eftir að úrskurður verður kveðinn upp.
Stuðningsmenn Galatasaray hentu blysum inn á völlinn í 4:1-tapi liðsins gegn Arsenal. Hið sama var uppi á teningnum hjá stuðningsmönnum Dortmund í 3:0-sigrinum á Anderlecht.
Stuðningsmenn Basel munu hafa kastað hlutum inn á völlinn í 1:0-sigrinum á Liverpool. Svissnesku meistararnir eru á skilorði vegna óláta stuðningsmanna í Evrópudeildinni á síðustu leiktíð.