Samkvæmt nýrri skýrslu KPMG um verðmæti evrópskra knattspyrnufélaga eru stórveldin Real Madrid og Manchester United verðmætustu knattspyrnufélögin í Evrópu.
Heildarvirði stærstu knattspyrnufélaga Evrópu er samtals 26,3 milljarðar evra. Real Madrid og Manchester United eru efst á lista, en heildarvirði hvors félags er um 2,9 milljarðar evra. Virði þriggja verðmætustu félaganna, Real Madrid, Manchester United og Barcelona, nemur um þriðjungi af heildarvirði allra 32 knattspyrnufélaganna sem eru metin í skýrslunni.
Ensku félögin stærst
Ensku knattspyrnufélögin leiða listann en samanlagt virði þeirra nemur yfir 10 milljörðum evra sem er um 40% af samanlögðu virði allra 32 félaganna. Arsenal, Manchester City, Chelsea og Liverpool skipta 5-8 sæti listans. Spænsku félögin fylgja þeim ensku á eftir, heildarvirði þeirra er um 6,6 milljarðar evra og þar nemur virði risanna í Barcelona og Real Madrid um 85% af spænska hlutanum. Atlético de Madrid, mótherji Real Madrid í Meistaradeild Evrópu og helsti keppinautur risanna í spænsku A-deildinni, er í 14. sæti á listanum og er virði þeirra um 590 milljónir evra.
Flest félögin í könnuninni koma frá Ítalíu og Englandi, sjö félög frá hvoru landi. Heildarvirði ítölsku félaganna er þó um 70% lægra en þeirra ensku.
Þetta er fyrsta verðmatsskýrsla KPMG um evrópsk knattspyrnufélög og er markmiðið að gefa vísbendingu um virði 32 stærstu knattspyrnufélaga Evrópu. Skýrslan er gefin út í tilefni af úrslitaleik Meistaradeildar Evrópu á milli Real Madrid og Atlético Madrid næsta laugardag.
Grunnur skýrslunnar er greining á opinberum upplýsingum um tiltekin félög fyrir knattspyrnutímabilin 2013-2014 og 2014-2015. Skýrslan tekur ekki mið af árangri félaganna á nýafstöðnu knattspyrnutímabili.
Fimmtán verðmætustu félög Evrópu eru eftirfarandi:
1. Real Madrid og Manchester United - 2,905 milljarðar evra
3. Barcelona - 2,758 milljarðar evra
4. Bayern München - 2,153 milljarðar evra
5. Arsenal - 1,663 milljarðar evra
6. Manchester City - 1,620 milljarðar evra
7. Chelsea - 1,453 milljarðar evra
8. Liverpool - 1,273 milljarðar evra
9. Juventus - 983 milljarðar evra
10. Paris Saint-Germain - 843 milljónir evra
11. Borussia Dortmund - 830 milljónir evra
12. Tottenham Hotspur - 801 milljón evra
13. Schalke 04 - 624 milljónir evra
14. Atlético de Madrid - 592 milljónir evra
15. AC Milan - 545 milljónir evra