Landsliðsmaðurinn Birkir Már Sævarsson skoraði eitt mark í 3:3 jafntefli Hammarby við Varbergs í sænska bikarnum í knattspyrnu í dag.
Birkir minnkaði muninn í 2:1 á 12. mínútu en Hammarby lenti 2:0 undir eftir 10 mínútur.
Ögmundur Kristinsson stóð í marki Hammarby og Arnór Smárason lék einnig allan leikinn ásamt Birki Má.
Leikið er í riðlum til að byrja með í sænska bikarnum þar sem efsta lið hvers riðils kemst í átta liða úrslitin. Eftir tvo leiki er Hammarby með fjögur stig í 2. sæti í riðli 7. Östersund hefur 6 stig í 1. sæti riðilsins en þessi lið eiga eftir að mætast í riðlinum.
Þá kom Elías Már Ómarsson inn í lið Gautaborgar á 67. mínútu er liðið slátraði Arameisk-Syrianska 6:0.
Gautaborg hefur sex stig í riðli 3 ásamt Sirius en liðin mætast í lokaleik riðilsins í algjörum úrslitaleik um sæti í átta liða úrslitum.
Birkir Már og Arnór sjást hér að neðan fagna marki Birkis í dag.
Birkir gratuleras till den snabba reduceringen. #Bajen pic.twitter.com/JK8OdqcP9u
— Hammarby Fotboll (@Hammarbyfotboll) February 26, 2017