Barcelona varð í kvöld spænskur bikarmeistari í knattspyrnu eftir 3:1 sigur á Alavés í úrslitaleik á Vicente Calderon-vellinum í Madrid.
Þetta var 29. sigur Barcelona í bikarkeppninni á Spáni og sá þriðji í röð.
Lionel Messi kom Barcelona í 1:0 á 30. mínútu en Theo Hernandez jafnaði metin fyrir Alaves aðeins þremur mínútum síðar, 1:1.
Neymar kom Barcelona í 2:1 rétt fyrir hálfleik, á 45. mínútu, og skömmu síðar í uppbótartíma fyrri hálfleiks lokaði Franscisco Alcacer nánast leiknum fyrir Barcelona og breytti stöðunni í 3:1 sem urðu lokatölur.
Leikurinn var sá síðasti undir stjórn Luis Enrique sem hættir í starfi knattspyrnustjóra liðsins og kveður með bikarmeistaratitli.