Gleymdi eigin treyjunúmeri (myndskeið)

Knattspyrnumaðurinn Tiémoué Bakayoko hefur ekki átt sjö dagana sæla síðan hann gekk til liðs við Chelsea frá Monaco árið 2017. Hann heillaði fáa með spilamennsku sinni á sínu fyrsta tímabili með Chelsea í ensku úrvalsdeildinni og var lánaður til AC Milan á síðustu leiktíð.

Hann er í dag lánsmaður hjá franska fyrstudeildarliðinu Monaco og hefur hann byrjað tíu leiki í deildinni þar sem hann hefur lagt upp eitt mark. Bakayoko var í byrjunarliði Monaco sem vann 3:0-heimasigur gegn Amiens í frönsku 1. deildinni um helgina.

Á 80. mínútu ákvað Leonardo Jardim, þjálfari Monaco, að gera breytingu á liði sínu. Jardim kallaði leikmann númer 14 af velli og ætlaði Bakayoko þá að ganga af velli. Miðjumaðurinn lék í treyju númer 14 áður en hann gekk til liðs við Chelsea sumarið 2017.

Hann leikur hins vegar í treyju númer 6 í dag en virtist vera búinn að gleyma því, við mikinn fögnuð liðsfélaga sinna. Monaco er í ellefta sæti deildarinnar með 24 stig eftir sautján umferðir, þremur stigum frá Evrópusæti.

• Blogga um frétt